“Сахал” Д.Эрдэнэбилэг тэргүүтэй “Эрдэнэт” үйлдвэрийн 49 хувийн хэрэг хууль хяналтын байгууллагаар шалгагдсаар олон жил болж байна. Улайм цайм төрийн мөнгийг санхүүгийн лувйрын схемээр авчихсан энэ хэрэг шийдвэрлэгдэхгүй удаад буй шалтгаан нь МАНАН бүлэглэл, хамгаалагч хууль шүүхийн гар хөл болж буй хүмүүсээс хамааралтай гэж олон нийт үзэж байв. Тэгвэл энэ сарын 21-ний өдөр Сүхбаатар дүүргийн шүүх “Эрдэнэт” үйлдвэрийн 49 хувийн хувьцааг худалдан авах шат дамжлага хэрхэн явж ирсэн, үнэн зөв байсан эсэхийг тогтоох нь.

“Эрдэнэт” үйлдвэрийн 49 хувийн хувьцааг худалдан авсан 400.270.000 ам.долларын санхүүжилтыг босгосон схемийг танилцуулъя.

• Сангийн яамны виксел /2016.02.25/ 183.6 тэрбум төгрөг “Кью Эс Си” ХХК-д
• Монголбанкны өрийн бичиг /2014.11.28/ 100 тэрбум төгрөг “Кью Эс Си” ХХК-д
• Монголбанкны өрийн бичиг /2016.04.06/ 100 тэрбум төгрөг “Кью Эс Си” ХХК-д
• Хөгжлийн банкны зээл /2014.12.01/ 71.3 сая ам.доллар “Кью Эс Си” ХХК-д
• Хөгжлийн банкны зээл /2015/ 51.3 сая ам.доллар “Кью Эс Си” ХХК-д гэж схемийг тайлбарлав. 

“Кью Эс Си” ХХК нь Дарханы төмөрлөгийн үйлдвэртэй холбоотой бөгөөд захирлаар Э.Шижир, ТУЗ-ийн даргаар Д.Эрдэнэбилэг нар ажилладаг гэв.  “Кью Эс Си” ХХК-иас Д.Эрдэнэбилэгийн үеэл дүүгийн “Хээдвей трейднг”, “Пик девилофмент” компаниудаар дамжуулан “Монголын зэс корпораци”-ийн захирал Ц.Пүрэвтүвшингийн дансанд 2016.04.21-нд 56.5 сая ам.доллар орсон байна. Мөн 2016.06.20-нд 62.9 сая ам.доллар оржээ. Түүнчлэн Аж үйлдвэрийн яам, Худалдаа хөгжлийн банк, Монголбанкны зузаатгал нэрээр ямарваа барьцаа хөрөнгөгүйгээр 2015-2016 онд 283 сая ам.долларын санхүүжилт хийгдсэн гэв. 

• Аж үйлдвэрийн яам /2015-2016/ 90.3 сая ам.доллар
• Худалдаа хөгжлийн банкны барьцаагүй зээлээр 111.2 сая ам.доллар
• Монголбанкнаас зузаатгал нэрээр /2016.06/ 81.5 сая ам.долларын санхүүжилт хийжээ. 

Дээрх хөрөнгийг “Канетик”, “Риверстаун Пропертис”, “Юнайтед Энержи” компаниудаар дамжуулан "Монголын зэс корпораци" болон Ц.Пүрэвтүвшингийн дансанд орсон гэлээ. 

"Монголын зэс корпораци"-ийн дансанд 

• 62.9 сая ам.доллар /2016.06.20/
• 56.5 сая ам.доллар /2016.04.21/
• 90.3 сая ам.доллар /2016.06.20/
• 81.5 сая ам.доллар /2016.06.20/
• 111.2 сая ам.доллар /2016.06.20/ буюу нийт 400.27 сая ам.долларын санхүүжилт хийгдсэний дийлэнх болох 72.4 хувийг төрөөс зээлж авсан байна.

“Эрдэнэт” үйлдвэрийн 49 хувийн хувьцааг худалдаж авсныхаа дараа буюу 2016 онд “Монголын зэс корпорци” тус үйлдвэрээс 119.3 сая ам.доллар гаргуулсан гэж танилцуулав. 

• Белазын төлбөр /2016.03/ 3.6 сая ам.доллар
• Гэрээний төлбөрийн  40 хувийн урьдчилгаа /2016.08/ 15 тэрбум төгрөг
• Гэрээний төлбөр /2016.08/ 17.2 тэрбум төгрөг
• Ган бөмбөлөг нийлүүлсний төлбөр /2016.08/ 87 тэрбум төгрөг
• Ногдол ашиг /2016.08/ 58.3 сая ам.доллар нийт 119.3 сая ам.долларыг гаргуулж үүнийгээ үйлдвэрийн 49 хувийн хувьцааг худалдан авахад зориулж Худалдаа хөгжлийн банкнаас гаргасан 111.2 сая ам.долларыг төлөхөд зарцуулсан байна.

Ийнхүү улсыг их хэмжээний мөнгөөр хохироосон “Эрдэнэт” үйлдвэрийн 49 хувийн хэрэг гэж нэрлэгдсэн хэрэг тун удахгүй шүүхээр орж, хэрхэн шийдвэрлэгдэхийг харах л үлдлээ.  

Д.НАРАН