Улсын Их Хурлын гишүүний бүрэн эрхийг түдгэлзүүлэх эсэх асуудлыг хаалттай хэлэлцэхээр товлоод буй юм.

УИХ-ын гишүүн Н.Алтанхуяг "УИХ-ын гишүүдтэй холбоотой асуудлыг шүүхийн байгууллага дээр нээлттэй хэлэлцэж, иргэдийн мэдэх эрхийг хангах ёстой" гэлээ.

УИХ-ын Ерөнхий нарийн бичгийн дарга Л.Өлзийсайхан "Уг асуудал нь төрийн болон албаны нууцад хамаарах учир нээлттэй хэлэлцэх боломжгүй" гэсэн тайлбар өгөв. Ийнхүү чуулганы нэгдсэн хуралдаан хаалттай горимд шилжлээ.

эргэн сануулахад.. УИХ-ын гишүүний халдашгүй байдлын дэд хороо УИХ-ын гишүүн Н.Наранбаатар, Т.Аюурсайхан, Б.Бат-Эрдэнэ нарын бүрэн эрхийг түдгэлзүүлэх Улсын ерөнхий прокурорын саналыг хүлээн авах нь зөв, хуулийн байгууллагад ажлаа хийх боломж олгох ёстой гэж шийдсэн байна. Түүний дараа МАН-ын бүлэг, УИХ-ын Төрийн байгуулалтын болон Хууль зүйн байнгын хороо хаалттай хуралдаж, гишүүдийн бүрэн эрхийг түдгэлзүүлэх нь зүйтэй гэдэг шийдвэрийг гаргаад байгаа билээ.